Kơdră chĕp pơgơ̆r dêh char Dak Lăk pơtrŭh nơ̆r hmach pran jăng grăng akau ăn rim ƀok soi hăm kon pơlei lui khop lơ̆m dêh char sơng pơyan Noel chơt hơ iă ‘nă hal, sơđơ̆ng dơ̆ng kơjăp, hơnuk hơnoa. Adoi ‘meh vă rim ƀok soi hơnơ̆ng pơrô̆ pơrôp, pơtho khan ăn kon pơlei lui khop jang kiơ̆ kơjăp ‘lơ̆ng trong bơ̆ jang đơ̆ng Đảng, khôi luơ̆t Teh đak, hơnơ̆ng tơgoăt tơgoăl pôm nơ̆r ƀơ̆r đon păng đei lơ tơdrong tơgop ăn atŏk tơ iung mŭk drăm-tơpôl dêh char.

Tang măt ăn rim hơnih lui khop hlôi pơtruh nơ̆r hmach bơnê kơ khul kơdră chĕp pơgơ̆r dêh char păng rim hơnih bơ̆ jang hlôi lăng ba, pơjing rơvơn ăn kon pơlei lui khop pơm kiơ̆ ‘lơ̆ng sơnong jang mơ̆ng kơdih lui khop. Lơ̆m khei năr au kơnh, tơpôl kon khop gô hơnơ̆ng jang kiơ̆ ‘lơ̆ng trong bơ̆ jang, khôi luơ̆t kơ Teh đak, kiơ̆ yok rok jơng ‘lơ̆ng tơdrong joăt joe hơrih sa ‘lơ̆ng lui kơjăp, atŭm dih băl tơ iung pơjing tơpôl tơgoăt tơgoăl pôm nơ̆r ƀơ̆r đon hơdrech hơdrung, yak hơdoi hăm dêh char lơ̆m tơ iung pơjing păng atŏk tơ iung dêh char roi năr roi pơdrŏng ‘lơ̆ng liĕm.