Lơ tơdrong hlôi đei pơma tơlĕch tơ̆ jơ tơƀơ̆p, lơ̆m ou tơdrong hơlĕnh pơdăr lơ̆m mạng pơm ăn lơ bơngai jang pŭh ƀơm, pơm hiong răm mŭk drăm jên hu. Vang năm ‘măng tơƀơ̆p păng pơma dơnuh, Thiếu tướng Nguyễn Thị Xuân, Kơ iĕng Kơdră chĕp pơgơ̆r Kŏng ang dêh char Dak Lăk tơbăt, đơ̆ng sơnăm 2023 truh dang ei, Kŏng ang dêh char Dak Lăk hlôi dăr lăng, đei ƀôh păng tơkêng 7 ‘măng đe pơm glăi, 8 ‘nu bơngai pơm glăi hơlĕnh pơdăr tơgar iŏk mŭk drăm jên hu lơ̆m mạng. Thiếu tướng Nguyễn Thị Xuân jei sơkơ̆t hơdăh, hơnih jang Kŏng ang rim hơnih ưh kơ xek tơlang hơmet pơ ‘lơ̆ng rim tơdrong glăi ‘moi kiơ̆ điên thoăi păng mạng tơpôl mă lei truh tơƀơ̆p hloi dăh mă pơtruh hla bơar vă hơvơn dôm bơngai đei ƀơm truh năm tơ̆ hơnih bơ̆ jang kŏng ang vă xek tơlang hloi.