Kơsơ̆ năr 17/5, tơ̆ Hơnih bơ̆ jang Trung ương Đảng, yă Trương Thị Mai, Kơdră jang lơ̆m Hơnih tơm Chinh trĭ, Kơdră chĕp pơgơ̆r Ban Bí thư, hlôi sơng pơma dơnuh hăm Khul tang măt Hơnih bơ̆ jang Vei lăng năng tông Kĕch mang Cuba kơ yuơ ƀok Gerardo Hernandez Nordelo, Kơdră jang lơ̆m Trung ương Đảng Cộng sản Cuba, Kơdră jang lơ̆m Jơnŭm chĕp pơgơ̆r Teh đak Cộng hòa Cuba, Kơdră Hơnih bơ̆ jang Vei lăng năng tông Kĕch mang Cuba, pơm Kơdră Khul iung năm ngôi, bơ̆ jang tơ̆ Việt Nam.

Yă Trương Thị Mai sơkơ̆t hơdăh, Đảng, Teh đak păng kon pơlei Việt Nam ling lang yak hơdoi păng ‘meh vă tơgoăt kơjăp hloh dơ̆ng tơdrong tơgoăt tơgoăl pôm nơ̆r ƀơ̆r đon gĭt kăl hăm Đảng, Teh đak păng kon pơlei Cuba ‘nhong oh, hơnhăk ba tơdrong tơgoăt tơgoăl ƀar teh đak atŏk tơ iung hơnơ̆ng, roi năr roi ‘lơ̆ng liĕm lơ̆m chăl ‘nao. Ƀok Gerardo Hernandez Nordelo sơkơ̆t hơdăh, jơhngơ̆m đon tơgoăt tơgoăl, tơklep dih băl kơjăp păng tơdrong hôn bơnê đơ̆ng kon pơlei Cuba hăm trong bơ̆ jang nuih mơng pran kơtang đơ̆ng kon pơlei Việt Nam lơ̆m chăl sơnăm tơblăh vang hrang tơƀet pơm rơngei ăn hơdrech hơdrung păng ‘măng iung jang atŏk tơ iung hrei au.