Tơbăt tơ̆ jơ bơ̆ jang, ƀok Phạm Minh Tấn, Kơ iĕng Kơdră chĕp pơgơ̆r Đảng dêh char Đak Lăk tơbăt, ‘ngoăih dôm tơdrong iŏk đei jơnei, 6 khei blŭng sơnăm, tơdrong sơđơ̆ng chinh trĭ, sơđơ̆ng tơpôl kơ dêh char oei đei lơ tơdrong tim gan sơđơ̆ng. Bơ̆ jang hơlen băt tơdrong, tơdrong kăl găh sơđơ̆ng đei khei ‘năr tim mă tơtom, tim mă kơtang. Tơdrong jang pơđĭ kon pơlei vang vei lăng sơđơ̆ng Teh đak tơ̆ mĭnh ƀar tơring tim mă pran kơjăp iăp kơtang.

Iung pơma tơ̆ jơ bơ̆ jang, ƀok Phan Đình Trạc, Kơdră chĕp pơgơ̆r Hơnih bơ̆ jang Nội chính Trung ương athei Khul kơdră chĕp pơgơ̆r Đảng dêh char Đak Lăk atŏk kơtang hơnăp jang chĕp pơgơ̆r, pơrô̆ jang tơlĕch jang kiơ̆ tôm tong păng atŏk đei jơnei rim trong bơ̆ jang tang găn hơlau sa pơgơ̆m pơjĭp, tơdrong pơm glăi au to; tơlĕch jang kiơ̆ tơtom, tôm tong rim trong bơ̆ jang đơ̆ng Đảng, khôi luơ̆t Teh đak găh tang găn sa pơgơ̆m pơjĭp, pơm tơdrong glăi au to, tơklep hăm bơ̆ jang tơ iung pơjing, ming hơmet Đảng. Mă kăl, Khul kơdră chĕp pơgơ̆r Đảng dêh char Đak Lăk kăl kiơ̆ yok dôm trong jang ‘lơ̆ng, hơ iă, hơmet pơ ‘lơ̆ng tơnap tap, tim mă trŏ lăp vă chĕp pơgơ̆r, pơrô̆ jang, jang kiơ̆ ‘lơ̆ng bơ̆ jang vei lăng sơđơ̆ng chinh trĭ, vei lăng sơđơ̆ng dơ̆ng kơjăp tơpôl, tơtom ƀôh, xek tơlang tơtom, xek tơlang dôm tơdrong đei ƀôh ưh kơ tom băt, ‘nĕ kơ lê̆ ưh kơ măh ê au to.