Tơ̆ jơ tơƀơ̆p, khul hlôi pôk ăn 250 tơnô̆ tơmam drăm, kơjă kơjên 1 triu 300.000 hlak jên lơ̆m 1 tơnô̆ ăn đoàn viên, bơngai jang ŭnh hnam tơnap tap lơ̆m dêh char.

Iung pơma tơ̆ jơ tơƀơ̆p, yă Bùi Thị Minh Hoài, Kơdră chĕp pơgơ̆r Hơnih Pơrô̆ pơrôp Trung ương pơma hơdăh, Dak Lăk ‘nŏh dêh char tŏk bŏk kơ Tây Nguyên, rim hơnih mơdro sa lơ̆m dêh char jĭ hơnih mơdro sa păh ai păng iĕ, kơ yuơ lơ loh, tơdrong vei lăng năng tông ăn bơngai jang ‘noh tơdrong jang tôch gĭt kăl kơ rim hơnih bơ̆ jang. Khei năr kơnh, rim kơdră chĕp pơgơ̆r kơ Dak Lăk kăl tơlĕch rim trong jang trŏ lăp, ‘lơ̆ng hơ iă hloh dơ̆ng bơ̆ jang vei lăng năng tông ăn bơngai jang, sơđơ̆ng hơrih sa jang sa tơpôl, tơjur dơnuh kơjăp ‘lơ̆ng.