Hơnơ̆ng hop akŏm mă 7, pơgê au, năr 4/6, Kuô̆k hô̆i iung jang blŭng apĭnh păng tơl nơ̆r apĭnh đơ̆ng rim kơdră tang măt Kuô̆k hô̆i.

Đei pơgơ̆r lơ̆m 2 năr 1 poăt, ‘măng apĭnh akŏm lơ̆m 4 tơdrong găh lơ̆m tơdrong: Mŭk drăm bri brăh păng Cham char, Vei lăng Mơdro sa, bơ̆ jang Dăr lăng hơlen kon jên hu, Jŏh ayŏ-Đă ƀŏng lŏng tơplŏng kơdau păng Tơmang pơhiơ̆. Kiơ̆ pơgơ̆r hop akŏm pơgê, Kơdră chĕp pơgơ̆r Hơnih tơm jang Mŭk drăm bri brăh păng Cham char tơl nơ̆r apĭnh mă blŭng.  ‘Măng mă blŭng đei rơ̆ih tơl nơ̆r apĭnh tơ̆ hơnăp Kuô̆k hô̆i, Kơdră chĕp pơgơ̆r Hơnih tơm jang Mŭk drăm bri brăh păng Cham char Đặng Quốc Khánh gô pơm hơdăh găh tơdrong vei lăng, iŏk yua, vei lăng cham char đak dơsĭ teh đak. Atŭm hăm ‘noh tơdrong jang kiơ̆ trong bơ̆ jang, Khôi luơ̆t găh sơđơ̆ng ‘lơ̆ng ăn kơ đak; trong tang găn phang pơđang, đak ƀăt ƀoh hram mơ̆t, ưh kơ măh, pơm tơjur, pơm ‘mê̆ ‘mach đak. Trong jang chă tơchĕng hơlen, năm tơchă, sir iŏk, iŏk yua mŭk drăm lơ̆m teh pơm tơmam drăm ming man păng mŭk drăm kăp gĭt hui kơđei lơ̆m teh.