Kiơ̆ tơbăt, dêh char Gia Lai oei tơƀơ̆p tơnap tap kơ yuơ tim mă pơjing Tơdrong tơchơ̆t sơkơ̆t hơdăh dôm tơdrong chĕng hơdrar teh, tơdrong trŏ lăp kơ teh păng hơgăt teh iĕ hloh lơ̆m chĕng asong kơ loăi teh; Tim mă đei nơ̆r pơma tơbăt hơdăh tơdrong jang kiơ̆ iŏk yua teh bri vă jang tơdrong jang anai.

Dêh char Gia Lai apĭng athei Khul kơdră teh đak, Ban Bí thư hơmet pơ ‘lơ̆ng tơdrong kon pơlei bơbĭt iŏk teh jang sa lơ̆m teh bri, groi teh đei pơjao teh bri ưh kơ đei ‘long vă pơtăm ‘long. Iung pơma pơtôch tơ̆ jơ bơ̆ jang, Kơdră chĕp pơgơ̆r Hơnih tơm vei lăng Mŭk drăm bri brăh păng Cham char Đặng Quốc Khánh athei, lơ̆m khei năr kơnh dêh char Gia Lai kăl lăng ba kơjăp truh bơ̆ jang vei lăng teh, xek tơlang tơdrong iŏk yua teh sơđơ̆ng ƀlep tơdrong pơkăp păng tơdrong tơchơ̆t kơ khôi luơ̆t. Hơnơ̆ng tơlĕch jang kiơ̆ bơ̆ jang pơm hla kak groi teh, hla kak tơring păng hla bơar chih răk groi teh mă ‘lơ̆ng hơ iă.