Pơgê năr 14/6, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hăm Kơ iĕng Kơdră chĕp pơgơ̆r Kuô̆k hô̆i Trần Thanh Mẫn vang chĕp pơgơ̆r ‘măng bơ̆ jang kơ Khul kơdră chĕp pơgơ̆r Kuô̆k hô̆i hăm Khul bơ̆ jang dăr lăng kơ Hơnih bơ̆ jang Kuô̆k hô̆i găh “Tơdrong jang kiơ̆ Tơdrong tơchơ̆t kơsô̆ 88 păng Tơdrong tơchơ̆t kơsô̆ 51 kơ Kuô̆k hô̆i găh tơplih ‘nao trong pơtho, kơsơ̆p hla bơar hŏk pơhrăm jăl pêng”.

Iung pơma tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ tơbăt, ‘nau jĭ mĭnh lơ̆m 4 tơdrong tơm dăr lăng kơ Kuô̆k hô̆i, Hơnih bơ̆ jang chĕp pơgơ̆r Kuô̆k hô̆i lơ̆m sơnăm 2023.  Pơtôch đơ̆ng rŏng 9 khei dăr lăng hlôi đei 63 khul tang măt Kuô̆k hô̆i, 48 Jơnŭm vei lăng kon pơlei dêh char hlôi tơroi tơbăt pơtôch jang đei ƀơm truh tơdrong au. Kơdră chĕp pơgơ̆r Kuô̆k hô̆i pơma hơdăh, trong vă pơjing tơdrong tơchơ̆t ‘nŏh jing trong jang tuch luch kơ khul bơ̆ jang dăr lăng, kơyuơ lơ loh, kăl hơlen mă hơdăh dôm tơdrong yă kiơ ƀlep, yă kiơ tim mă ƀlep, tim mă lăp, hăm đei pơm glăi ưh, tơdrong pơm ăn ‘nŏh yă kiơ, hơnăp jang lơ liơ păng Khul bơ̆ jang dăr lăng tơlĕch nơ̆r athei, apĭnh tơdrong yă kiơ? Dôm tơdrong au vă pơm kơnăl ăn Khul bơ̆ jang dăr lăng athei rim hơnih jang, khul jang iung jang kiơ̆.