Tơbăt, khei ‘năr uơ oei, Kuô̆k hô̆i gô tơlĕch jang 3 ‘măng hop akŏm joăt joe păng 1 ‘măng hop akŏm pơtôch jăl jang Kuô̆k hô̆i jăl XV, Kơdră chĕp pơgơ̆r Kuô̆k hô̆i Trần Thanh Mẫn akhan, ‘nou jĭ dôm tơdrong jang oei tôch kơ lơ. Kơ yuơ lơ loh, Kơdră chĕp pơgơ̆r Kuô̆k hô̆i athei, Jơnŭm vei lăng kon kông, rim Hơnih Bơ̆ jang kơ Kuô̆k hô̆i kăl jang kiơ̆ kơtang vă jang keh đang ‘lơ̆ng tơdrong jang đei pơjao. Mă kăl, sơnăm 2025, teh đak bơ̆n đei lơ tơdrong pơgơ̆r tih nhen: Tơbăt 80 sơnăm Kĕch mang Khei 8 păng Kuô̆k khanh năr 2/9; 50 sơnăm Rơngei tơring Pơbăh Teh đak rơngei keh kong; bơ̆ jang hơmet ăn pôk rơ̆ih Kơdră tang măt Kuô̆k hô̆i jăl XVI păng Jơnŭm vei lăng kon pơlei rim hơnih jăl jang 2026-2031. Sơnăm 2026, Kuô̆k hô̆i tơbăt 80 sơnăm năr pôk rơ̆ih tih pôk rơ̆ih Kuô̆k hô̆i Việt Nam.