Kơdră chĕp pơgơ̆r Kuô̆k hô̆i hơlen, dôm sơnăm ou ki, Đăi hŏk Cần Thơ hlôi lăng kơ jăp pơtho ‘lơ̆ng kơ rim ƀok thây kô, đei lơ giáo sư lơ̆m rim hnam trương đăi hŏk. Adoi pơkă, Đăi hŏk Cần Thơ ưh khan atŏk tơ iung khul kang ƀô̆, ƀok thây kô ăn kơdih mă kăl atŏk tơ iung khul jang ăn rim hnam trương đăi hŏk anai lơ̆m tơring; tơdrong jang pơtho pơhrăm lăng hloi pơtho pơjing khul jang vă atŏk tơ iung ăn tơring, mă lei jei lăng truh pơtho pơjing ƀok thây kô pơtho tơgum ăn bơ̆ jang tơplih ‘nao pơtho pơhrăm; pơm pơkeh dôm tơdrong tơchơ̆t pơkăp kơ hnam trương, lăng kơjăp tơ iung pơjing tơdrong tơchơ̆t vă rim bơngai khoa hŏk hưch hanh hloh dơ̆ng lơ̆m tơdrong jang. Đăi hŏk Cần Thơ kăl pơtho nơ̆r teh đak đe nhen nơ̆r Khmer, Lào ăn kang ƀô̆ tơ̆ Tơring Tơmăn đak kroong Cửu Long; atŏk kơtang jang khoa hŏk kih thuơ̆t lơ̆m jang kiơ̆ choh jang sa vă atŏk kơtang jang sa pơm tơlĕch, tĕch mơdro tơ̆ teh đak đe.