Tơ̆ jơ sơng, Kơdră chĕp pơgơ̆r Kuô̆k hô̆i Trần Thanh Mẫn sơkơ̆t hơdăh Đảng, Teh đak păng kon pơlei Việt Nam ling lang lăng kăl păng ‘meh vă atŭm hăm Khul kơdră teh đak păng kon pơlei Hàn Quốc hơnơ̆ng atŏk tơ iung kơtang lang să, tơpă păng iŏk đei kơjăp lơ̆m tơgoăt tơgoăl Jang hơdoi Tôm tong hăm Hàn Quốc. Hrei ou Hàn Quốc ‘noh teh đak mơdro sa tih hloh dơ̆ng mă 3 kơ Việt Nam (lăp dơ̆ng đơ̆ng rŏng Trung Quốc păng Mi). Sơnăm 2023, tĕch mơdro dih băl iŏk đei 76 ti USD, 6 khei blŭng sơnăm iŏk đei 40 ti USD. Trong tơlĕch ăn ƀar teh đak pơm hơtŏk tĕch mơdro dih băl iŏk đei truh 100 ti USD lơ̆m sơnăm 2025 păng lăng truh iŏk đei 150 ti USD lơ̆m sơnăm 2030 kiơ̆ trong hơtŏ hơnơ̆ng. Kơdră chĕp pơgơ̆r Kuô̆k hô̆i Trần Thanh Mẫn athei lơ̆m khei năr kơnh, ƀar păh atŏk kơtang tơƀơ̆p dih băl, năm ngôi dih băl kơ khul kơdră kơpal păng rim hơnih, rim khul nghĭ si tơgoăt tơgoăl Việt Nam - Hàn Quốc, Hàn Quốc - Việt Nam, khul nghĭ si tơgoăt tơgoăl sơnăm mơlôh ... lơ̆m rim tơdrong jang tơ iung pơjing khôi luơ̆t adoi nhen bơ̆ jang dăr lăng.