Kơdră chĕp pơgơ̆r Kuô̆k hô̆i pơma hơdăh, Việt Nam lăng kăl lơ̆m tơgoăt tơgoăl, jang hơdoi lơ tơdrong hăm Ma-rốc; ‘meh vă jang hơdoi lơ̆m lơ tơdrong vă ƀar păh vang atŏk tơ iung; hmach chơt hơ iă ăn Ma-rốc iŏk đei jơnei găh mŭk drăm-tơpôl lơ̆m khei năr ou ki, mă kăl ‘noh jing teh đak pơdrŏng mă 5 kơ tơring châu Phi.

Kơdră chĕp pơgơ̆r Kuô̆k hô̆i  Trần Thanh Mẫn akhan, Kuô̆k hô̆i Việt Nam hăm hạ viện, Thượng viện Ma-rốc hlôi tơgŭm djru dih băl tơ̆ rim ‘măng hop akŏm Nghị viện Châu Á - Thái Bình Dương, Jơnŭm atŭm Nghĭ viên apŭng plĕnh teh. Khei năr ou kơnh, Kơdră chĕp pơgơ̆r Kuô̆k hô̆i athei, Kuô̆k hô̆i/Nghị viện ƀar teh đak vei kơjăp ăn khul kơdră kơpal năm ngôi dih băl, rim kơdră chă tơƀơ̆p pơma dơnuh tơbăt dih băl lơ̆m bơ̆ jang pơjing khôi luơ̆t; jang hơdoi kơjăp tơ̆ rim ‘măng hop akŏm lơ pang, jơnŭm atŭm nghĭ viên lơ̆m tơring păng lơ̆m apŭng plĕnh teh.