Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơtang tơdrong jang kơ Jơnŭm vei lăng kon pơlei dêh char Thanh Hoá khei năr ou ki hlôi đei lơ trong tơplih ‘nao, tơchăr hơ iă, pơm hơtŏk ‘lơ̆ng bơ̆ jang kiơ̆ trong roi năr roi hơ iă, gơ̆h hơgei, jơnei kơtang. Lơ̆m khei năr kơnh, Kơdră chĕp pơgơ̆r Kuô̆k hô̆i athei dêh char hơnơ̆ng vei kơjăp păng iung jang kơtang hloh dơ̆ng lơ̆m chĕp pơgơ̆r, pơrô̆ jang, akŏm lơ̆m rim trong jang kăl, hơmet pơ ‘lơ̆ng tơhlăk tơhlĭn, iung jang kiơ̆ dôm tơdrong rơvơn, tơdrong đei kơ dêh char tơklep kơjăp hăm jang kiơ̆ jơhngơ̆m pran kơ tơpôl kon pơlei lơ̆m dêh char. Kơdră chĕp pơgơ̆r Kuô̆k hôi pơkă, Thanh Hóa hơnơ̆ng tơlĕch jang kiơ̆ jơnei rim tơdrong đei, rơvơn, pơtrŭt kơtang atŏk tơ iung mŭk drăm. Mă kăl jang kiơ̆ jơnei rim trong jang atŏk tơ iung choh jang sa, bri ‘long, ka hơdang, tơmam drăm, tơklep hăm tơ iung pơjing tơring tơrang ‘nao, lăng kơjăp atŏk tơ iung choh jang sa kiơ̆ kmăi kmŏk hơgei, tơplih jơhngơ̆m đon đơ̆ng choh jang sa hmă jing choh jang sa pơm tơlĕch tơmam drăm.