Iung pơma tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ akhan, Hop akŏm Nghĭ sy sơnăm mơlôh lơ̆m plei teh ‘măng mă 9 ‘noh tơdrong jang tơbôl lơ pang tih hloh kơ yuơ Kuô̆k hô̆i Việt Nam iŏk chĕp pơgơ̆r lơ̆m sơnăm 2023.

Hop akŏm hlôi pơgơ̆r jơnei kơtang, tơgop tơƀôh tơbăt jơ̆p jang păng ‘lơ̆ng liĕm găh um rup, teh đak, kon bơngai Việt Nam, găh Kuô̆k hô̆i Việt Nam, găh oei sa joh ayŏ Việt Nam. Kơdră chĕp pơgơ̆r Kuôk hô̆i jei akhan, tơ̆ Hop akŏm Nghĭ sy sơnăm mơlôh lơ̆m Plei teh ‘măng mă 9, Kuô̆k hô̆i Việt Nam hlôi rơ̆ih ƀlep tơdrong găh tơplih kơsô̆ păng tơplih tơchăr hơgei. Tơdrong au hlôi pơjing jơhngơ̆m đon chơt hơ iă ‘nă hal ăn rim bơngai tang măt vang năm hop akŏm. Kiơ̆ đơ̆ng Kơdră chĕp pơgơ̆r Kuô̆k hô̆i, đơ̆ng bơ̆ jang tơbôl lơ pang au, Kuô̆k hôi Việt Nam gô chĕp pơgơ̆r rim tơdrong pơgơ̆r kăl anai.