Iung pơma pơtôch hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh, trong vă pơjing Khôi luơ̆t groi teh (hơmet ming) năr 1/8 hlôi đei chih hơmet ‘moi kiơ̆ akŏm tôm păng tơgoăt iŏk, rơ̆ih hơlen nơ̆r tơgop đơ̆ng rim Kơdră tang măt Kuô̆k hô̆i lơ̆m’măng hop akŏm au ki, nơ̆r tơgop đơ̆ng rim hơnih bơ̆ jang kơ Kuô̆k hô̆i, rim hơnih bơ̆jang păng khul jang ƀơm truh, kon pơlei.

Kơdră chĕp pơgơ̆r Kuô̆k hô̆i jei hôn bơnê kơtang, hơnih chĕp kơ̆l chih tơlĕch păng Khul kơdră teh đak hlôi iung jang hơdoi kơtang hăm Hơnih bơ̆ jang Mŭk drăm păng rim hơnih bơ̆ jang kơ Kuô̆k hô̆i, hlôi hơmet mĭnh ƀar tơdrong ‘noh jei vă sơđơ̆ng bơih. Truh dang ei, tơdrong ‘lơ̆ng kơ trong vă pơjing khôi luơ̆t ‘noh tôch hơ iă păng tŏk bŏk yak ƀlep trong. Kơdră chĕp pơgơ̆r Kuô̆k hô̆i athei trong vă pơjing Khôi luơ̆t Groi teh (hơmet ming) kăl sơđơ̆ng tôm tong trŏ lăp hăm rim khôi luơ̆t anai lơ̆m trong bơ̆ jang Khôi luơ̆t, mă kăl ‘nŏh hăm rim trong vă pơjing khôi luơ̆t mă Kuô̆k hô̆i tŏk bŏk lăng hơlen, kĭ tơchơ̆t; ưh kơ iŏk yua khôi luơ̆t au vă tơplih rim trong jang kơ rim khôi luơ̆t anai.