Lơ̆m sơnăm 2023, muk drăm-tơpôl dêh char Tây Ninh sơđơ̆ng păng đei hơyak atŏk tơ iung. Rim trong tơlĕch jang tơpôl-cham char jang keh đang. Lơ̆m au găh tơjur dơnuh iŏk đei jơnei ‘lơ̆ng, ŭnh hnam dơnuh kơ Tây Ninh lăp pă 0,67%, jĭ mĭnh lơ̆m dôm dêh char đei ŭnh hnam dơnuh tŏ sĕt hloh lơ̆m teh đak.

Iung pơma tơ̆ jơ bơ̆ jang, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang dôm tơdrong hơdrin chinh trĭ, ‘meh vă atok kơtang đơ̆ng Hơnih Đảng, Khul kơdră chĕp pơgơ̆r, ƀô̆ đô̆i, kŏng ang păng kon pơlei dêh char Tây Ninh, tơdrong tơplih ‘nao jơhngơ̆m đon atŭm trong tơlĕch jang ‘lơ̆ng hơ iă đơ̆ng kơdră chĕp pơgơ̆r Đảng, kơdră chĕp pơgơ̆r tơring, tơdrong jang mŭk drăm dêh char Tây Ninh hlôi yak hloh tơnap tap, hơnơ̆ng tŏk kơtang; sơđơ̆ng hơrih sa tơpôl, vei lăng năng tông bơngai đei iŏk yua ăn teh đak; mă kăl ‘nŏh bơ̆ jang tơjur dơnuh iŏk đei jơnei kơtang. Kơdră chĕp pơgơ̆r Kuô̆k hô̆i Vương Đình Huệ athei, lơ̆m khei năr kơnh, dêh char Tây Ninh lăng kơjăp jang kiơ̆ ƀlep trong tơlĕch jang đơ̆ng Trung ương, Khul kơdră teh đak hơdrin iung jang kơtang vă iŏk đei jơnei kơtang hloh dơ̆ng lơ̆m pơđĭ jăl jang.