Sơng kơdră chĕp pơgơ̆r Kuô̆k hô̆i Vương Đình Huệ hăm Khul tang măt Kuô̆k hô̆i Việt Nam tơ̆ cham gre păr đei Kơdră tang măt Việt Nam tơ̆ Indonesia atŭm hăm rim bơngai tang măt ăn kon pơlei Việt tơ̆ Jakarta. Lăp đơ̆ng rŏng pơm lêh sơng, Kơdră chĕp pơgơ̆r Kuô̆k hô̆i Vương Đình Huệ pơma đam hăm Kơdră chĕp pơgơ̆r Hă viê̆n Indonesia yă Poan Maharani.

Kơdră chĕp pơgơ̆r Hă viê̆n Indonesia hôn bơnê kơtang ‘măng iung năm tơmang tơ̆ Indonesia ‘măng mă blŭng đơ̆ng Kơdră chĕp pơgơ̆r Kuô̆k hô̆i Vương Đình Huệ păng jei jing ‘măng năm tơmang Indonesia ‘măng mă blŭng đơ̆ng Kơdră chĕp pơgơ̆r Kuô̆k hô̆i Việt Nam đơ̆ng rŏng 13 sơnăm. Ƀar ‘nu kơdră drơ̆ng mĭnh nơ̆r găh rim trong jang tơm vă hơnơ̆ng pơtrŭt kơtang tơgoăt tơgoăl dih băl lơ̆m khei năr kơnh, hơnơ̆ng atŏk kơtang ăn khul kơdră năm ngôi dih băl, tơƀơ̆p dih băl, mă kăl rim kơdră kơpal bơ̆ jang Đảng, Teh đak, jang hơdoi Nghĭ viê̆n, tơgoăt tơgoăl jang hơdoi ƀar păh rim tơring păng kon pơlei năm ngôi dih băl, iung jang ‘lơ̆ng tơbăt 10 sơnăm tơgoăt tơgoăl Jang hơdoi gĭt kăl păng lăng truh tơbăt 70 sơnăm tơgoăt tơgoăl tơbôl sơnăm 2025.