Kơsơ̆ brei, năr 25/9, (kiơ̆ jơ Việt Nam), lơ̆m ‘măng iung năm tơmang teh đak Bungari, Pơm lêh sơng Kơdră chĕp pơgơ̆r Kuô̆k hô̆i Vương Đình Huệ pơgơ̆r tơ̆ Cham să Aleksander Nevski, lơ̆m Hơnih tơm Sofia kơ yuơ Kơdră chĕp pơgơ̆r Kuô̆k hô̆i Bulgari Rosen Zhelyazkov chĕp kơ̆l. Lăp đơ̆ng rŏng pơm lêh sơng, Kơdră chĕp pơgơ̆r Kuôk hô̆i Vương Đình Huệ pơma đam hăm Kơdră chĕp pơgơ̆r Kuô̆k hô̆i Bulgari. 

Tơ̆ pơma đam, Kơdră chĕp pơgơ̆r Kuôk hô̆i Vương Đình Huệ sơkơ̆t hơdăh, Việt Nam ling lang lăng kơjăp păng ‘meh vă atŏk kơtang tơgoăt tơgoăl joăt joe păng jang hơdoi lơ tơdrong hăm Bulgari; lui kơ ‘măng năm tơmang au gô tơgop pơtrŭt kơtang jang hơdoi kơtang hloh dơ̆ng, ‘lơ̆ng hơ iă hloh dơ̆ng, tôm tong hloh dơ̆ng lơ̆m rim tơdrong. Lơ̆m jơhngơ̆m đon tơgoăt tơgoăl ‘lơ̆ng hơ iă păng phăl hơlăng, ƀar ‘nu kơdră chĕp pơgơ̆r Kuô̆k hô̆i pơma dơnuh dih băl lơ tơdrong, pơ đĭ dôm tơdrong jang kơ ƀar păh păng lơ pang. Hăm hơpơi ‘meh vă păng hơdrin hơnhăk tơgoăt tơgoăl jang hơdoi kơtang hloh dơ̆ng, tơpă hloh dơ̆ng păng jơnei hloh dơ̆ng lơ̆m rim tơdrong, ƀar păh hlôi drơ̆ng mĭnh nơ̆r minh ƀar trong vă jang hơdoi.