Tơ̆ pơma đam, ƀar păh tơbăt jơhngơ̆m đon chơt hơ iă ‘nă hal găh tơdrong iŏk đei jơnei đơ̆ng rŏng vă jê̆ 75 sơnăm ƀar teh đak tơbôl, jang hơdoi Việt Nam - Bulgari atŏk tơ iung kơtang lơ̆m pơđĭ rim tơdrong jang chinh trĭ-tơbôl, muk drăm-mơdro sa-tơmơ̆t jên jang, khoa hŏk-kmăi kmŏk, pơtho pơhrăm, vei lăng sơđơ̆ng teh đak, joh ayŏ, đă ƀŏng lŏng tơplŏng kơdau păng tơmang pơhiơ̆, jang hơdoi tơring.

Ƀar ‘nu Kơdră chĕp pơgở Kuô̆k hô̆i vang drơ̆ng mĭnh nơ̆r akhan, ƀar păh hrôih hop akom Hơnih jang hơdoi Khul kơdră teh đak găh jang hơdoi mŭk drăm, mơdro sa, khoa hŏk lơ̆m sơnăm au, pơ̆ih truh rim tơdrong jang hơdoi ‘nao, pơjing rơvơn tĕch răt ăn tơmam drăm dih băl kiơ̆ Tơdrong tơchơ̆t Mơdro sa hiôk hian Việt Nam – EU EVFTA. Việt Nam plôih ‘măng ăn rim Hơnih mơdro sa Bulgari tơmơ̆t jên jang, mơdro sa rim tơmam drăm kăl. Păh Bulgari ‘meh vă jang hơdoi tĕch mơdro tơmam drăm hăm Việt Nam lơ̆m dôm tơdrong đei nhen kmăi kmŏk hơgei; pơgang hơmet jĭ jăn, kmăi kmŏk pơre nơ̆r, tơchăr, tơmang pơhiơ̆.