‘Nau jĭ Kơdră chĕp pơgơ̆r Trung Quốc mă blŭng mă Kơdră chĕp pơgơ̆r Kuô̆k hô̆i Vương Đình Huệ pơma dơnuh lơ̆m ‘măng năm tơmang Trung Quốc. Tơdrong Tổng Bí thư, Kơdră chĕp pơgơ̆r Trung Quốc Tập Cận Bình hơmet jơ ‘năr tơƀơ̆p Kơdră chĕp pơgơ̆r Kuô̆k hô̆i Vương Đình Huệ mă blŭng lăp đơ̆ng rŏng mưh khul năm truh tơ̆ Bắc Kinh tơbăt hơdăh jơhngơ̆m đon lăng kơjăp tơgoăt tơgoăl ƀar teh đak păng ‘măng năm tơmang đơ̆ng khul tang măt kơdră kơpal kơ Đảng păng teh đak Việt Nam.

Ƀar ‘nu kơdră chĕp pơgơ̆r pơma tơbăt jơhngơ̆m đon chơt hơ iă tơ̆ hơnăp tơdrong atŏk kơtang kơ tơgoăt tơgoăl Việt Nam - Trung Quốc, pơma hơdăh, gô hơnơ̆ng atŏk kơtang ăn kon pơlei năm ngôi dih băl, atŏk kơtang hơnăp jang kơ bơngai kơdră tang măt Kuôk hô̆i kơ ƀar Teh đak lơ̆m tơdrong tơbăt kơtơ̆ng ang, pơrô̆ pơrôp, pơjing đei drơ̆ng mĭnh nơ̆r tơpôl, đơ̆ng noh atŏk kơtang jang hơdoi ƀar teh đak lơ̆m rim tơdrong. Hôn bơnê kơtang păng tơbăt jơhngơ̆m đon lăng kơjăp rim tơdrong tơlĕch ăn jang hơdoi đơ̆ng Việt Nam, Tổng Bí thư, Kơdră chĕp pơgơ̆r Teh đak Trung Quốc Tập Cận Bình sơkơt hơdăh, Trung Quốc drơ̆ng nơr atŭm hăm Việt Nam vei kơjăp pơma dơnuh dih băl, pơtrŭt kơtang tơƀơ̆p dih băl kơdră kơpal, atŏk kơtang, năm ngôi, jang hơdoi kơ khul Đảng, tơbăt dih băl trong jang hơ iă găh tơ iung pơjing Đảng păng vei lăng Teh đak, atŏk kơtang jang hơdoi tơpă, pơtrŭt kơtang iung jang dôm tơdrong kăl, hôn bơnê Việt Nam vang iung jang tơgoăt kơjăp hăm trong jang kăl atŏk tơ iung tơring tih să kơ Trung Quốc.