Hăm vă jê̆ 60 tơdrong pơgơ̆r tơ̆ ƀar teh đak, tơdrong jang tôch kơ lơ lăp đơ̆ng rŏng jur đơ̆ng gre păr, ‘măng năm tơmang teh đak Cộng hòa Indonesia păng vang Hop akŏm Jơnŭm chĕp pơgơ̆r AIPA 44; ‘măng năm tơmang teh đak Hồi giáo Iran đơ̆ng kơdră chĕp pơgơ̆r Kuô̆k hô̆i Vương Đình Huệ hăm Khul tang măt kơdră kơpal Kuô̆k hô̆i teh đak bơ̆n hlôi iŏk đei jơnei hơ iă.

Kuô̆k hô̆i Việt Nam – Indonesia păng Việt Nam – Iran hlôi kĭ drơ̆ng mĭnh nơ̆r jang hơdoi vă trŏ lăp hăm tơgoăt tơgoăl ƀar păh ƀar teh đak adoi nhen atŏk kơtang jang hơdoi ƀar păh Kuô̆k hô̆i, mă kăl atok kơtang ăn khul kơdră năm ngôi dih băl, pơma dơnuh dih băl lơ̆m rim tơdrong jang pơjing khôi luơ̆t adoi nhen iung jang hơdoi bơ̆ jang dăr lăng, jang hơdoi lơ̆m hop akŏm apŭng plĕnh teh. ‘Ngoăih kơ ‘noh, tơ̆ ‘măng năm tơmang au, rim hơnih tơm, hơnih bơ̆ jang ƀơm truh jei hlôi đei kĭ pơkăp drơ̆ng mĭnh nơ̆r jang hơdoi lơ̆m rim tơdrong jang phara dih băl. ‘Nau jing hơyak kăl hloh ăn tơgoăt tơgoăl jang hơdoi dih băl. Vang năm Hop akŏm jơnŭm chĕp pơgơ̆r AIPA -44, Kơdră chĕp pơgơ̆r Kuô̆k hô̆i Vương Đình Huệ jei hlôi đei tơƀơ̆p dih băl hăm rim kơdră teh đak anai vă pơma dơnuh dôm trong jang atŏk kơtang tơgoăt tơgoăl dih băl hloh dơ̆ng hăm rim teh đak lơ̆m tơring.