Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, lơ̆m trong bơ̆ jang tơbôl đơ̆ng Việt Nam hơnơ̆ng lăng kơjăp tơgoăt tơgoăl hăm Nhật Bản; ‘meh vă ƀar păh atŏk kơtang rim hơnih jang Đảng, Khul kơdră Teh đak, Kuô̆k hô̆i, kon pơlei năm ngôi dih băl, jang hơdoi ƀar păh hơnih mơdro sa hăm hơnih mơdro sa, tơring hăm tơring.

Ƀar ‘nu kơdră chĕp pơgơ̆r jei akhan, ƀar păh kăl atŏk kơtang tơƀơ̆p dih băl khul kơdră kơpal, rim hơnih jang, khul nhgĭ si vă tơbăt dih băl trong bơ̆ jang hơ iă, lơ̆m au đei tơdrong jang tơ-iung pơjing khôi luơ̆t, dăr lăng păng tơchơ̆t rim tơdrong kăl kơ teh đak. Ƀar păh vang sơkơ̆t hơdăh, Việt Nam păng Nhật Bản jei kơrŭn đĭ jơhngơ̆m păng tơgŭm djru trong jang lơ̆m vei kơjăp rơngei hiôk hian, sơđơ̆ng, sek tơlang dôm tơdrong tơgar dih băl tơ̆ Biển Đông hăm trong rơngei hiôk hian, trŏ lăp hăm khôi luơ̆t apŭng plĕnh teh, lơ̆m au đei Tơdrong Pơkăp Liên hợp quốc găh Khôi luơ̆t đak dơsĭ sơ 1982.