Ƀlep lơ̆m jơ ‘năr vang năm Hop akŏm Jơnŭm chĕp pơgơ̆r AIPA ‘măng mă 44 tơ̆ Jakarta-Indonesia, Kơdră chĕp pơgơ̆r Kuô̆k hô̆i Vương Đình Huệ tơƀơ̆p Kơdră chĕp pơgơ̆r Hạ viện Philipines Ferdinand Martin Romualdez.

Tơ̆ jơ tơƀơ̆p, Kơdră chĕp pơgơ̆r Kuô̆k hô̆i Vương Đình Huệ hôn bơnê dôm hơyak atŏk tơ-iung kơtang lơ̆m rim tơdrong kơ tơdrong tơgoăt tơgoăl Jang hơdoi gĭt kăl Việt Nam- Philipines, mă kăl ‘nŏh tơƀơ̆p dih băl khul kơdră kơpal. Ƀar ‘nu kơdră chĕp pơgơ̆r drơ̆ng mĭnh nơ̆r atŏk tơgoăt tơgoăl ƀar teh đak atŏk tơ iung ‘lơ̆ng liĕm, mă kăl ‘nŏh lơ̆m tơdrong jang mŭk drăm-mơdro sa păng tơmơ̆t jên jang, hơdrin hrôih pơjing đei tơdrong tĕch mơdro dih băl iŏk đei truh 10 ti dolar. Kơdră chĕp pơgơ̆r Kuô̆k hô̆i athei Việt Nam păng Philipines kăl jang hơdoi vă atŏk tơ iung kơtang hloh dơ̆ng lơ̆m tơdrong pơm tơlĕch tĕch mơdro dih băl, pơjing rơvơn ăn tơdrong răt tơmơ̆t tơmam drăm tơm kơ Việt Nam, lơ̆m au đei phe, tơmam drăm tơ iung pơjing ming man păng dôm tơmam drăm mă Philipines đei lơ păng Việt Nam ‘meh vă răt iŏk. Ƀar păh jei drơ̆ng mĭnh nơ̆r jang hơdoi lơ̆m tơdrong kăl ‘noh tơplih kơsô̆ păng tơplih iŏk yua ŭnh hơyuh.