Iung pơma tơ̆ jơ tơƀơ̆p, Kơdră chĕp pơgơ̆r Kuô̆k hô̆i Vương Đình Huệ pơma hơdăh, sơnăm 2023, lơ̆m dôm tơdrong iŏk đei jơnei atŭm kơ Kuô̆k hô̆i, ling lang đei tơdrong vang yak hơdoi, tơdrong tơgop gĭt kăl đơ̆ng rim hơnih chih kơtơ̆ng ang.

Rim hơnih chih kơtơ̆ng ang ling lang iung jang kơtang chih tơlĕch tôm, tơtom, ‘lơ̆ng hơ iă dôm tơdrong bơ̆ jang kơ Kuô̆k hô̆i truh hăm bơngai tăh hla păng Kon pơlei lơ̆m teh đak; tơgop pơm hơtŏk jơhngơ̆m đon păng tơdrong tơgum djru đơ̆ng Kon pơlei hăm rim trong bơ̆ jang kơ Kuô̆k hô̆i; ba rim khôi luơ̆t, tơdrong tơchơ̆t đơ̆ng Kuô̆k hô̆i, Hơnih chĕp pơgơ̆r Kuô̆k hô̆i hrôih đei jang kiơ̆. Hơnih chih kơtơ̆ng ang hlôi tơbăt tơtom jơhngơ̆m đon hơpơi ‘meh vă đơ̆ng rim hơnih chih kơtơ̆ng ang, rim khul, rim bơngai tăh hla, Kon pơlei ăn Hop akŏm Kuô̆k hô̆i păng jĭ mĭnh hơnih jang kăl hloh vă Kon pơlei dăr lăng hơlen Kuô̆k hô̆i, rim kơdră tang măt Kuô̆k hô̆i, đei tơdrong mơ̆t lĕch dih băl ƀar păh. Kơdră chĕp pơgơ̆r Kuô̆k hô̆i pơkă athei, Kơdră chĕp pơgơ̆r tơdrong jang chih kơtơ̆ng ang hơnơ̆ng pơm hơtŏk jơhngơ̆m đon chinh trĭ; lăng ba kơjăp hloh dơ̆ng pơtho pơhrăm tôm tong ‘lơ̆ng liĕm khul chih kơtơ̆ng ang, khul jang chih akŏm hơtŏ hăm tơdrong jang đei pơjao, lăng truh tơbăt 100 sơnăm Năr khul chih kơtơ̆ng ang kĕch mang Việt Nam (21/6/1925 - 21/6/2025).