Yak hloh 30 sơnăm pơjing păng atŏk tơ iung, truh dang ei Khul Bơngai mơdro sa sơnăm mơlôh hlôi đei pơjing tơ̆ 63 dêh char, pơlei tơm; hăm đei 15 kâu lak ƀô̆ hăm vă jê̆ 19.000 ‘nu bơngai. Rim hơnih mơdro sa kơ rim bơngai lơ̆m Khul tŏk bŏk pơjing đei jang sa iŏk đei hlŏh 40 ti dolar Mi lơ̆m rim sơnăm păng pơjing đei tơdrong jang ăn hloh 5 triu ‘nu bơngai jang.

Lơ̆m khei năr atŏk tơ iung Khul hlôi pơgơ̆r lơ tơdrong jang ‘lơ̆ng hơ iă tơgŭm djru ăn rim bơngai mơdro sa sơnăm mơlôh pơjing tơdrong jang, pơtrŭt mơdro sa, tơmơ̆t jên jang, jang hơdoi apŭng plĕnh teh. Iung pơma tơ̆ jơ tơƀơ̆p, Kơdră chĕp pơgơ̆r pơgia Teh đak Võ Thị Ánh Xuân sơkơ̆t hơdăh, khul mơdro sa ‘noh mĭnh lơ̆m khul kăl hloh tơgop atŏk kơtang tơdrong jang kmăi kmŏk gơ̆h hơgei kơ teh đak păng vang mơ̆t hơdoi apŭng plĕnh teh; athei Khul Bơngai mơdro sa sơnăm mơlôh Việt Nam kăl jang kiơ̆ kơjăp dôm tơdrong iŏk đei lơ̆m khei năr au ki, hơnơ̆ng tơplih ‘nao, trong pơgơ̆r vă druh kiơ̆ tom apŭng plĕnh teh, adoi trŏ lăp hăm tơdrong ‘meh vă kơ teh đak, adoi tơklep kơjăp hăm khul jang kơdih.