Khul pơlong dih băl rim dêh char Tây Nguyên păng Tơring Tơmăn Tŏk bŏk đei 10 dêh char: Gia Lai, Kon Tum, Đắk Lắk, Đắk Nông, Lâm Đồng, Quảng Nam, Quảng Ngãi, Bình Định, Phú Yên, Khánh Hòa hăm akŏp groi teh să hloh 87.180 km2 (tơmơ̆t 26,3% hơgăt teh lơ̆m teh đak.

Lơ̆m sơnăm au ki, rim dêh char Khul pơting dih băl rim dêh char tơring Tây Nguyên păng Tơring Tơmăn Tŏk bŏk jang kiơ̆ ‘lơ̆ng rim trong tơlĕch pơlong dih băl nhen: Atŏk kơtang tơ iung pơjing trong nơnăm ‘lơ̆ng hơ iă; jang kiơ̆ pơkom, tang găn pơhoach brăh brư. ‘Moi kiơ̆ tơdrong jang pơting dih băl “Pơđĭ lơ̆m teh đak vang kơrŭn tơ iung pơjing tơring tơrang ‘nao” jăl jang 2021-2025, tơring tơrang choh jang sa kơ rim dêh char lơ̆m Khul pơlong dih băl roi năr roi tơplih ‘nao, trong hnam đei tơmơ̆t ming man, hơmet ming ‘lơ̆ng; tơdrong hơrih sa, jơhngơ̆m đon kơ kon pơlei đei sơđơ̆ng. Iung pơma tơ̆ Hop akŏm, yă Võ Thị Ánh Xuân, Kơdră chĕp pơgơ̆r pơgia teh đak hôn bơnê kơtang tơdrong jang pơting dih băl, pôk hơpăh kơ rim dêh char găh Khul pơting dih băl rim dêh char Tây Nguyên păng Tơring Tơmăn Tŏk bŏk. Yă Võ Thị Ánh Xuân athei rim dêh char hơnơ̆ng jang kiơ̆ ‘lơ̆ng bơ̆ jang pơting dih băl pôk hơpăh kăl ƀlep yan au, trŏ lăp lơ̆m tơdrong hơrih sa păng đei jing hơyak pran ăn atŏk tơ iung teh đak.