Pơm lêh tơbăt jơnei rơngei Ngọc Hồi- Đống Đa oei krao akhan pơm lêh Gò Đống Đa đei pơgơ̆r lơ̆m năr 5 Têt Nguyên đán rim sơnăm vă ƀlŏk hơdơ̆r dơ̆ng tơdrong tơgop tih tên đơ̆ng bơngai nuih mơng ao che Quang Trung - Nguyễn Huệ atŭm hăm rim yŏng, khul lĭnh Tây Sơn hăm kon pơlei chăl doh sơ̆, hlôi nuih mơng iung tơblăh tang găn ayăt, vei lăng tơdrong pơm tơm kơdih hơdrĕch hơdrung. ‘Nau jĭ mĭnh lơ̆m dôm tơdrong pơgơ̆r lêh joăt joe tih hloh kơ pơlei tơm Hà Nội, tơbăt dơ̆ng chăl sơnăm nuih mơng, iŏk đei jơnei tih tên kơ hơdrĕch hơdrung.

Kiơ̆ hla bơar chih tơbăt, pơyan Puih mak sơnăm Kỷ Dậu 1789, gơnơm trong chĕp pơgơ̆r gơ̆h hơgei kơ bơngai nuih mơng ao che Quang Trung, khul lĭnh Tây Sơn hlôi iŏk đei jơnei tih tên, tơblăh pơrăm hŭt 29 rơbăn khul lĭnh Mãn Thanh mơ̆t pơjei, pơm rơngei ăn tơring kơdrơ̆m Thăng Long. Đơ̆ng mă noh, rim ‘măng puih mak truh, Pơm lêh tơbăt jơnei rơngei Ngọc Hồi - Đống Đa đei pơgơ̆r dơ̆ng, hơvơn rơbăn ‘nu kon pơlei, tơmoi vang năm, vang pơm lêh, vang sot hlôt nhang ƀlŏk hơdơ̆r ăn rim bơngai nuih mơng pran kơtang kơ hơdrĕch hơdrung khul lĭnh Tây Sơn.