Lơ̆m kơthơ hmach chơt hơ iă, Thủ tướng Singapore lui akhan, tơdrong tơgoăt tơgoăl kơjăp ƀar păh Singapore hăm Việt Nam gô hơnơ̆ng đei atŏk kơtang hăm trong chĕp pơgơ̆r đơ̆ng Tổng Bí thư, Kơdră chĕp pơgơ̆r teh đak Tô Lâm. Tổng Thư ký Đảng Hành động Nhân dân Singapore Lý Hiển Long sơkơ̆t hơdăh Singapore ling lang iung jang hơdoi hăm Việt Nam hơlen băt hơdăh rim tơdrong rơvơn mŭk drăm păng trong jang kăl lơ̆m tơring, pơ̆ih să jang hơdoi păng pơm kơtang hloh dơ̆ng tơgoăt tơgoăl ƀar păh ƀar đảng, pơm hơtŏk loi dơ̆ng tơgoăt tơgoăl ƀar păh ƀar teh đak. Thủ tướng Australia hmach chơt hơ iă ăn ƀok Tô Lâm đei pôk tơmơ̆t jang kơchư̆k Tổng Bí thư Ban Chấp hành Trung ương Đảng Cộng sản Việt Nam, sơkơ̆t hơdăh, Australia hăm Việt Nam ‘noh dôm bơngai boăl kơjăp ‘lơ̆ng, tơgoăt tơgoăl ƀar teh đak hlôi đei hơyak pran đơ̆ng sơ̆ ‘noh tơgoăt tơgoăl kơjăp ƀar păh kon pơlei ƀar teh đak păng lui yom chinh trĭ kơtang. Đảng Cộng sản Mi sơkơ̆t hơdăh, hlôh vao kloh klĕch đơ̆ng Tổng Bí thư, Kơdră chĕp pơgơ̆r teh đak Tô Lâm găh rim trong bơ̆ jang kơ Chủ nghĩa Mác-Lênin păng trong bơ̆ jang kơ Đảng Cộng sản Việt Nam hlôi pơjing đei trong chĕp pơgơ̆r hơgei ‘lơ̆ng hơ iă kơ ƀok, tơgop tơ iung pơjing Việt Nam đei jing mĭnh tơpôl gơ̆h hơgei, đei tơdrong jang mŭk drăm ‘moi kiơ̆ trong xã hội chủ nghĩa, mĭnh teh đak ‘lơ̆ng hơ iă hăm tơdrong hơrih sa roi năr roi atŏk tơ iung.