Ƀok Tô Lâm, Kơdră ‘nao chĕp pơgơ̆r Teh đak.

Tổng Bí thư, Kơdră chĕp pơgơ̆r teh đak Cộng hòa dân chủ Nhân dân Lào Thongloun Sisoulith tôch chơt hơ iă păng hmach chơt hơ iă ăn kơ ƀok Tô Lâm ƀlep lơ̆m jơ ‘năr ƀok Tô Lâm đei pôk tơmơ̆t jang Kơdră chĕp pơgơ̆r Teh đak Cộng hòa xã hội chủ nghĩa Việt Nam tơ̆ ‘Măng hop akom mă 7, Kuô̆k hô̆i jăl XV, tơbăt jơhngơ̆m lui kơjăp păng hôn bơnê kơtang kơ Đảng, Teh đak păng Kon pơlei Việt Nam ‘măn ăn kơ ƀok. Kơdră chĕp pơgơ̆r teh đak Cộng hòa Nhân dân Trung Hoa Tập Cận Bình hmach chơt hơ iă ăn kơ ƀok Tô Lâm đei pôk tơmơ̆t jang Kơdră chĕp pơgơ̆r Teh đak Cộng hòa xã hội chủ nghĩa Việt Nam. Adoi pơma tơbăt yom kơtang tơdrong tơgoăt tơgoăl Trung-Việt, ling lang atŭm hăm Kơdră chĕp pơgơ̆r Teh đak Tô Lâm vei kơjăp pơma dơnuh dih băl trong jang kăl, chông ba tơdrong tơ iung pơjing Tơpôl tơbăt dih băl hơnô̆ hơnăp kơnh Trung Quốc - Việt Nam iung jang kơtang ‘lơ̆ng hơ iă hloh dơ̆ng, hmach chơt hơ iă ăn Kơdră chĕp pơgơ̆r Teh đak iŏk đei jơnei tih tên hloh dơ̆ng lơ̆m kơ chư̆k ‘nao. Ƀok pơtao Campuchia hmach chơt hơ iă ăn Kơdră chĕp pơgơ̆r Teh đak Tô Lâm hlôi đei Kuô̆k hô̆i teh đak Cộng hòa xã hội chủ nghĩa Việt Nam pôk tơmơ̆t jang Kơdră chĕp pơgơ̆r teh đak păng lui akhan ưh kơ jor hăm trong chĕp pơgơ̆r đơ̆ng Kơdră chĕp pơgơ̆r Teh đak, teh đak Cộng hòa xã hội chủ nghĩa Việt Nam gô iŏk đei jơnei tih tên, atŏk tơ iung tĕnh koăng lơ̆m lơ tơdrong păng vei kơjăp hơnăp jang kăl lơ̆m tơring păng lơ̆m apŭng plĕnh teh.