Kơdră chĕp pơgơ̆r Teh đak Lương Cường hôn bơnê kơtang pơtôch ‘măng pơma đam ƀar păh Yŏng Ƀô̆ đô̆i vei lăng sơlam teh đak Việt Nam, Kơ iĕng Kơdră chĕp pơgơ̆r Hơnih Đảng Ƀô̆ đô̆i Trung ương Phan Văn Giang hăm Kơ iĕng Kơdră chĕp pơgơ̆r Hơnih Đảng Khul lĭnh Trung ương Trung Quốc Trương Hựu Hiệp, chơt hơ iă ƀôh tơdrong tơgoăt tơgoăl vei lăng teh đak ƀar păh hơnơ̆ng đei atŏk tơ iung ‘nao, jơnei, trŏ lăp hăm rim hla bơar hlôi kĭ pơkăp păng drơ̆ng mĭnh nơ̆r ƀar păh Kơdră kơpal ƀar Đảng, ƀar teh đak. Kơdră chĕp pơgơ̆r Teh đak athei lơ̆m khei năr kơnh Hơnih Đảng khul lĭnh Trung ương, Hơnih tơm lĭnh vei lăng sơlam teh đak kơ ƀar teh đak hơnơ̆ng atŏk kơtang hloh dơ̆ng tơgoăt tơgoăl jang hơdoi vei lăng teh đak ‘moi kiơ̆ rim tơdrong jang ăn khul kơdră năm ngôi, tơƀơ̆p pơma dơnuh dih băl, mă kăl kơdră kơpal; vei kơjăp jơnei rim trong jang hơdoi dang ei đei. Pơma hơdăh, sơnăm 2025 ‘noh sơnăm Việt Nam tơbăt 80 sơnăm pơjing teh đak păng 70 sơnăm pơjing tơbôl Việt Nam - Trung Quốc, ƀok Trượng Hựu Hiệp sơkơ̆t hơdăh, ƀar păh hơnơ̆ng vei kơjăp trong jang mă Kơdră kơpal ƀar Đảng, ƀar teh đak hlôi sơkơ̆t hơdăh; adoi atŏk kơtang jang hơdoi lơ̆m rim tơdrong, vă tơ iung pơjing Tơpôl tơbăt dih băl hơnô̆ hơnăp kơnh ‘lơ̆ng hơ iă hloh dơ̆ng.