Tang măt ăn Kơdră chĕp pơgơ̆r Đảng, Teh đak păng hăm hơnăp jang ‘nŏh sinh viên so kơ hnam trương, Kơdră chĕp pơgơ̆r Teh đak Võ Văn Thưởng pơma tơbăt jơhngơ̆m đon chơt hơ iă păng chhưu lơ̆m jơhngơ̆m đon mưh vih năm ngôi dơ̆ng hăm hnam trương lơ̆m dôm năr lơ̆m teh đak lăng truh tơbăt Năr Ƀok thây kô pơtho Việt Nam 20/11.

Kơdră chĕp pơgơ̆r Teh đak jei pơtruh nơ̆r apĭnh jet gia ‘lơ̆ng hơ iă truh hăm rim ƀok thây kô ƀlep lơ̆m năr 20/11. Hăm hloh 65 sơnăm tơ iung pơjing, khul ƀok thây kô pơtho hơnơ̆ng đei tơmơ̆t, atŏk tơ iung găh lơ, găh gơ̆h hơgei, lơ sơnăm bơ̆ jang chă tơchĕng hơlen, pơtho pơhrăm. Lơ Yăo sư, tiên si iŏk đei lơ hơnăn khoa hŏk pơtho pơhrăm gĭt kăl lơ̆m teh đak păng teh đak đe, đei sinh viên păng tơpôl ‘mêm kơ eng, yom kơtang. Ƀlep lơ̆m jơ ‘năr au, Kơdră chĕp pơgơ̆r teh đak jei pôk ăn 20 tơnô̆ kon jên hŏk pơhrăm kơjă kơjên 100 triu hlak jên ăn sinh viên hŏk hơgei kơ hnam trương păng 100 triu hlak jên lơ̆m tơdrong jang pơtrŭt hŏk pơhrăm, pơtrŭt hơgei kơ hnam trương.