Iung pơma tơ̆ jơ pơma dơnuh, Kơdră chĕp pơgơ̆r Teh đak Võ Văn Thưởng hôn bơnê kơ tang kơ Jơnŭm chĕp pơgơ̆r jang tơbôl kơ Mi đei dôm tơdrong jang hơdoi lơ̆m lơ sơnăm au ki hăm Việt Nam, tơgop kơtang lơ̆m atŏk kơtang hlôh vao dih băl ƀar păh hơdrĕch hơdrung păng atŏk tơ iung tơgoăt tơgoăl ƀar teh đak.

Kơdră chĕp pơgơ̆r Teh đak ‘meh vă hơnơ̆ng iŏk đei tơdrong tơgŭm djru gĭt kăl đơ̆ng rim pang jang hơdoi kơ Mi hăm tơdrong atŏk tơ iung păng vang mơ̆t hơdoi apung plĕnh teh kơ Việt Nam. Găh tơgoăt tơgoăl Việt Nam - Mi, Kơdră chĕp pơgơ̆r Teh đak pơma tơbăt dơ̆ng dôm jăl sơnăm ưh kơ ‘lơ̆ng hơ iă lơ̆m tơgoăt tơgoăl dih băl ƀar teh đak truh tơdrong tơgoăt tơgoăl dih băl ‘lơ̆ng hơ iă lơ̆m sơnăm 1995, mă kăl ‘noh đơ̆ng rŏng sơkơ̆t hơdăh tơgoăt tơgoăl Jang hơdoi gĭt kăl Tôm tong lơ̆m sơnăm 2013, tơgoăt tơgoăl ƀar teh đak hlôi atŏk tơ iung kơtang, tơpă, jơnei păng yak hloh jơhngơ̆m đon tơchĕng đơ̆ng lơ bơngai.