Sơng Kơdră tang măt New Zealand, Kơdră chĕp pơgơ̆r Teh đak Võ Văn Thưởng hôn bơnê kơtang ăn Kơdră tang măt teh đak hlôi tơgop kơtang păng jơnei, pơm hơtŏk loi dơ̆ng tơgoăt tơgoăl păng jang hơdoi ƀar păh Việt Nam - New Zealand.

Kơdră chĕp pơgơ̆r Teh đak ‘meh vă, truh au kơnh mă đơ̆ng hăm kơchư̆k jang yă kiơ, Kơdră tang măt teh đak jei hơnơ̆ng ‘măn jơhngơ̆m đon ‘mêm kơ eng păng pơtrŭt kơtang tơgoăt tơgoăl jang hơdoi Việt Nam-New Zealand. Sơng pơma dơnuh hăm Kơdră tang măt Peru, Kơdră chĕp pơgơ̆r Teh đak hmach bơnê ăn Kơdră tang măt Augusto Morelli jang keh đang ‘lơ̆ng jăl jang 6 sơnăm tơ̆ Việt Nam, tơgop kơtang păng jơnei lơm pơtrŭt tơgoăt tơgoăl ‘lơ̆ng liĕm ƀar păh Việt Nam-Peru. Peru ‘noh teh đak jang hơdoi gĭt kăl kơ Việt Nam lơ̆m rim teh đak lơ̆m tơring châu Mi La tinh păng hlôi phăl hơlăng tơbăt hơdăh dôm trong jang hơ iă, tơgum djru dih băl tơ̆ rim ‘măng hop akŏm lơ̆m tơring păng apŭng plĕnh teh. Kơdră chĕp pơgơ̆r teh đak hmach ăn Kơdră tang măt jang keh đang tơdrong jang lơ̆m kơchư̆k ‘nao păng ling lang lăng truh pơtrŭt kơtang tơgoăt tơgoăl ‘lơ̆ng hơ iă Việt Nam-Peru.