Tơ̆ jơ sơng, Kơdră chĕp pơgơ̆r Teh đak Võ Văn Thưởng hôn bơnê kơtang tơdrong tơgoăt tơgoăl jang hơdoi Việt Nam-Nhật Bản atŏk tơ iung kơtang, lang să păng tơpă lơ̆m rim tơdrong, jang hơdoi atŏk tơ iung tŏk kơtang hăm 100 khul tơgoăt tơgoăl tơring hlôi đei pơjing.

Kơdră chĕp pơgơ̆r Teh đak Võ Văn Thưởng hôn bơnê kơtang dôm tơdrong hơdrin đơ̆ng Kơdră chĕp pơgơ̆r dêh char Fukuoka păng kơdră chĕp pơgơ̆r rim dêh char tơring Kyushu lơm pơtrŭt kơtang jang hơdoi lơ̆m lơ tơdrong hăm Việt Nam. Kơdră chĕp pơgơ̆r Teh đak athei Kơdră chĕp pơgơ̆r dêh char Fukuoka păng kơdră chĕp pơgơ̆r rim dêh char tơring Kyushu kơrŭn đĭ jơhngơ̆m tơlĕch jang kiơ̆ kơjăp rim tơdrong tơgoăt tơgoăl ‘nao ‘moi kiơ̆ pơtrŭt kơtang rim khul jang hơdoi tơring ƀar păh tơring Kyushu hăm rim tơring Việt Nam, mă kăl lơ̆m rim tơdrong tơring đei nhen pơm tơlĕch, jang kiơ̆ choh jang sa hơgei, hơmet pơ ‘lơ̆ng đak ‘mê̆ ‘mach.