Lơ̆m ‘măng năm tơmang teh đak Nhật Bản, Kơdră chĕp pơgơ̆r Teh đak Võ Văn Thưởng hlôi sơng pơma dơnuh hăm Thủ tướng so, Kơ iĕng Kơdră chĕp pơgơ̆r Đảng Dân chủ tự do (LDP) Aso Taro, Kơdră chĕp pơgơ̆r Đảng Công Minh YamaguchiNatsuo, Kơdră chĕp pơgơ̆r Đảng Cộng sản Nhật Bản Shii păng khul rim nghĭ si, bơngai boăl joăt Nhật Bản tơgoăt tơgăl hăm Việt Nam.

Tơ̆ ‘măng tơƀơ̆p, Kơdră chĕp pơgơ̆r Teh đak Võ Văn Thưởng pơma hơdăh, tơgoăt tơgoăl Việt Nam - Nhật Bản hlôi đei hơtŏk jing Jang hơdoi gĭt kăl tôm tong kơ yuơ Rơngei hiôk hian păng pơdrŏng hơnŭk hơnoa tơ̆ châu Á păng lơ̆m plei teh păng tŏk bŏk dơ̆ng tơ̆ hơnăp tơdrong rơvơn vă atŏk tơ iung kơtang hloh dơ̆ng lơ̆m rim tơdrong, mă kăl lơ̆m dôm tơdrong jang ‘nao trŏ lăp hăm jang hơdoi lơ̆m 50 sơnăm tơ̆ hơnăp kơnh. Kơdră chĕp pơgơ̆r Teh đak athei rim kơdră jang chinh trĭ Nhật Bản lăng ba kơjăp, pơtrŭt kơtang tơlĕch jang kiơ̆ rim tơdrong jang hơdoi ƀar teh đak ‘moi kiơ̆ tơgoăt tơgoăl dih băl ‘nao. Rim kơdră chĕp pơgơ̆r, nghĭ si sơkơ̆t hơdăh gô kơrŭn đĭ jơhngơ̆m vă tơgop lơ̆m tơdrong atŏk tơ iung kơ tơgoăt tơgoăl Việt Nam – Nhật Bản, lơ̆m au đei atŏk kơtang ăn khul kơdră sơnăm mơlôh, nghĭ si sơnăm mơlôh ƀar teh đak chă tơƀơ̆p pơma dơnuh dih băl.