Sơng pơma dơnuh hăm Kơdră tang măt teh đak Cộng hoà Ba Lan Aleksander Surdej mơ̆t iŏk tơdrong jang tơ̆ Việt Nam, Kơdră chĕp pơgơ̆r Teh đak lui, Kơdră tang măt teh đak gô đei lơ tơdrong tơgop kơtang vă pơtrŭt tơgoăt tơgoăl ƀar teh đak. Kơdră chĕp pơgơ̆r teh đak pơma hơdăh, kon pơlei Việt Nam ling lang yom kơtang tơdrong tơgŭm djru gĭt kăl mă kon pơlei Ba Lan hlôi ‘măn ăn kơ Việt Nam lơ̆m prăt sơnăm tơblăh vang iŏk pơm tơm kơdih, teh đak rơngei keh kong adoi nhen lơ̆m bơ̆ jang tơ iung pơjing păng atŏk tơ iung hrei au.

Sơng pơma dơnuh hăm Kơdră tang măt teh đak Tây Ban Nha Carmen Cano De Lasala, Kơdră chĕp pơgơ̆r teh đak chơt hơ iă găh tơdrong jang hơdoi ƀar teh đak iŏk đei jơnei hơ iă lơ̆m rim tơdrong. Kơdră chĕp pơgơ̆r teh đak athei ƀar teh đak atŏk kơtang lui yom dih băl chinh trĭ, tơbôl, pơtrŭt kơtang rim ‘măng năm ngôi dih băl kơ khul kơdră kơpal păng rim hơnih jang.