Hmach chơt hơ iă ăn rim bơngai jang chih kơtơ̆ng ang sơnăm ‘lŏ kră ƀlep lơ̆m Năr Ƀăo chĭ kĕch mang Việt Nam, Kơdră chĕp pơgơ̆r teh đak pơma hơdăh, rim jơhnơr khul chih kơtơ̆ng ang đơ̆ng rŏng ou ling lang ƀlŏk hơdơ̆r rim bơngai jang chih kơtơ̆ng ang sơnăm ‘lŏ kră nhen dôm “pơnil hơdăh ang”, dôm bơngai đei tơtop tih tên ăn tơdrong jang chih kơtơ̆ng ang kĕch mang Việt Nam.

Kơdră chĕp pơgơ̆r Teh đak ‘meh vă rim bơngai jang chih kơtơ̆ng ang sơnăm ‘lŏ kră ling lang pran jăng grăng akou, gơ̆h hơgei, hơnơ̆ng kiơ̆ yok rok jơ̆ng jơhngơ̆m đon kĕch mang păng hăm dôm tơdrong hlôh vao đơ̆ng kơdih, tơgop lơ hloh dơ̆ng ăn tơdrong jang chih kơtơ̆ng ang kơ teh đak, adoi pơtho tơbăt tơdrong joăt joe ƀăo chĭ kĕch mang ăn jơhnơr mơlôh kiơ̆ yok rok jơ̆ng, hok pơhrăm, hơdrin jang kơtang. Rim bơngai chih kơtơ̆ng ang sơnăm ‘lŏ kră chhưu jơhngơ̆m chơt hiôk đei Kơdră chĕp pơgơ̆r Teh đak apĭnh jet gia pơma dơnuh; adoi chơt hơ iă tơ̆ hơnăp tơdrong atŏk tơ iung kơ teh đak lơ̆m khei năr ou ki. Rim kơdră jang kơtơ̆ng ang sơkơ̆t hơdăh, gô hơnơ̆ng kiơ̆ yok rok jơ̆ng tơdrong joăt joe ƀăo chĭ kĕch mang, vang pơtho tơbăt ăn jơhnơr mơlôh, hơdrin đĭ ai tơgop lơ̆m tơdrong atŏk tơ iung kơ teh đak.