Tơ̆ jơ sơng, Kơdră chĕp pơgơ̆r teh đak pơma hơdăh, Việt nam hăm Ấn Độ đei tơgoăt tơgoăl dih băl joăt joe kơjăp ‘lơ̆ng đei Kơdră chĕp pơgơ̆r păng Kon pơlei ƀar teh đak chĕp răk lơ̆m dôm jĭt sơnăm ou ki, păng hrei ou hlôi jing Teh đak jang hơdoi tôm tong đei hơnăp jang păng hơnih dơ̆ng kăl lơ̆m trong jang tơbôl dih băl.

Kơdră tang măt Ấn Độ sơkơt hơdăh, gô hơnơ̆ng pơtrŭt kơtang tơgoăt tơgoăl ƀar teh đak, ƀơ̆t măt ‘noh hơmet pơ ‘lơ̆ng rim ‘măng năm tơmang păng tơƀơ̆p dih băl kơdră kơpal lơ̆m khei năr kơnh, pơm hơtŏk kơtang hloh dơ̆ng jang hơdoi vei lăng sơđơ̆ng teh đak, jang mŭk drăm-mơdro sa-kmăi kmŏk, jŏh ayŏ-tơmang pơhiơ̆ păng pơih să rim tơdrong jang hle. Pơma dơnuh găh rim tơdrong lơ̆m tơring păng lơ̆m apŭng plĕnh teh, Kơdră chĕp pơgơ̆r ƀar teh đak hơnơ̆ng jang hơdoi kơjăp lơ̆m rim ‘măng hop akŏm lơ pang, tơgop lơ̆m tơdrong hơmet pơ ‘lơ̆ng rơngei hiôk hian, sơđơ̆ng păng atŏk tơ iung tơ̆ tơring Châu Á - Thái Bình Dương păng Ấn Độ Dương.