Kơdră chĕp pơgơ̆r Teh đak Tô Lâm sơkơ̆t hơdăh Việt Nam ling lang lăng kơjăp tơgoăt tơgoăl joăt joe păng jang hơdoi lơ tơdrong hăm Belarus hlôi đei Kơdră chĕp pơgơ̆r păng kon pơlei ƀar păh atŏk tơ iung đơ̆ng chăl Liên Xô adoi nhen đei hơnơ̆ng pơtrŭt kơtang lơ̆m hloh 30 sơnăm ou ki jô̆ đơ̆ng ƀar teh đak pơjing tơgoăt tơbôl sơnăm 1992; sơkơ̆t hơdăh Việt Nam ling lang lăng Belarus ‘noh bôl boăl, teh đak jang hơdoi ‘lơ̆ng hơ iă, mă kăl tơdrong tơgŭm djru đơ̆ng kon pơlei Belarus hlôi ‘măn ăn Việt nam sơ̆, hơdrin đĭ ai hơnơ̆ng atŏk kơtang jang hơdoi lơ tơdrong hăm Belarus.

Pơma dơnuh găh jang hơdoi tơ̆ rim khul jang apŭng plĕnh teh păng hop akŏm lơ pang, Kơdră chĕp pơgơ̆r Teh đak Tô Lâm hăm Kơdră tang măt Belarus drơ̆ng mĭnh nơ̆r ƀar teh đak hơnơ̆ng iung jang hơdoi păng tơgŭm djru dih băl tơ̆ hop akŏm apŭng plĕnh teh păng tơring, nhen Liên hợp quốc, Jơnŭm atŭm Mŭk drăm Á-Âu, kơ yuơ đei iŏk yua atŭm kơ ƀar teh đak, tơgop lơ̆m rơngei hiôk hian păng atŏk tơ iung tơ̆ tơring păng lơ̆m apŭng plĕnh teh.