Phương Cửa Đông đei hloh 2.000 ŭnh hnam kon pơlei hăm hloh 10.000 ‘nu măt bơngai, đei 7 koeng kơphô̆. Phương đei măt bơngai kơdrŏm. Lơ̆m phương đei hloh 400 hơnih bŏ jang, hơnih mơdro sa, Hơnih ƀô̆ đô̆i păng hơnih tĕch mơdro. Tơdrong mă ou pơm ăn đei lơ tơdrong long ăn hơnih bơ̆ jang găh tơdrong sơđơ̆ng dơ̆ng kơjăp tơpôl lơ̆m phương. Dôm sơnăm ou ki, Hơnih bơ̆ jang chĕp pơgô̆ tơ iung pơjing tơdrong jang đĭ đăng kon pơlei vang vei lăng Sơđơ̆ng Teh đak phương hơnơ̆ng tơlĕch trong jang kơ tơdrong jang đĭ đăng kon pơlei vang vei lăng sơđơ̆ng Teh đak nhen: Khul tang găn tơdrong yoch; tơdrong jang: “Ŭnh hnam vei lăng kơdih-Kơsô̆ hnam vei lăng kơdih”…hơvơn khul kon pơlei vang iung jang tang găn hơlou, iung tơjră phă pơrăm rim tơdrong đei pơm glăi, tơgop pơm dă ƀiơ̆ đei tơdrong yoch, vei kơjăp sơđơ̆ng chinh trĭ păng sơđơ̆ng tơpôl. Iung pơma tơ̆ hop akom, Kơdră chĕp pơgơ̆r Teh đak Tô Lâm athei khul kơdră đảng, kơdră chĕp pơgơ̆r tơring kơ pơlei tơm Hà Nội kăl hơnơ̆ng tơlĕch jang kiơ̆ kơjăp, jơnei rim trong bơ̆ jang, trong pơrô̆ jang găh tơ iung pơjing tơdrong jang đĭ đăng kon pơlei vang vei lăng sơđơ̆ng Teh đak păng pơgơ̆r "Năr lêh pơđĭ kon pơlei vang vei lăng sơđơ̆ng Teh đak”;kăl tơklep kơjăp ƀar păh tơdrong jang đĭ đăng kon pơlei vang vei lăng sơđơ̆ng Teh đak hăm rim tơdrong jang pơting dih băl jang pran kơtang kơ yuơ Đảng, Teh đak, rim hơnih bơ̆ jang, Mặt trận Tổ quốc păng hơnih jang tơpôl pơgơ̆r tơlĕch jang, pơjing hơyak ‘lơ̆ng kon pơlei vang iung jang tơnăp păng lang să kơtang lơ̆m tơdrong hơrih sa kơ kon pơlei.