Iung pơma tơ̆ jơ pơm lêh, Kơdră chĕp pơgơ̆r Teh đak Tô Lâm tơbăt jơhngơ̆m chơt hơ iă đei vih ngôi hăm groi teh kĕch mang ư hơnhang ang hơnhăk Pắc Bó tơklep kơjăp hăm Ƀok Hô, tơklep kơjăp hăm chăl sơnăm gĭt kăl kĕch mang kơ Đảng, Teh đak; adoi đei ƀôh kơmăt dôm tơdrong tơplih lơ̆m hơrih sa kơ kon pơlei tơ̆ au, đei ƀôh hơdăh trong hnam, rim tơdrong jang tơm kơ dêh char hlôi hơnhăk đei jơnei hơ iă, tơgop pơm hơtŏk tơdrong hơrih sa, mŭk drăm kơ kon pơlei.

Kơdră teh đak hôn bơnê kơtang kơ apŭng Hà Quảng dôm sơnăm au ki hlôi akŏm atŏk tơ iung mŭ drăm-tơpôl, sơđơ̆ng tơring, mă lei jei ling lang sơđơ̆ng ‘lơ̆ng hơ iă tơdrong hơrih sa kơ kon pơlei. Kơdră teh đak pơma hơdăh, lơ̆m chăl oei hơrih, Ƀok Hô ling lang lăng kơjăp bơ̆ jang vei lăng năng tông jơhnơr hơ ioh, mă kăl đei hơ ioh, hơdruh tơdăm… păng ‘nau jei tơdrong jang mă Đảng păng teh đak ling lang lăng ba kơjăp vă đĭ đăng hơ ioh đei năm tơ̆ hnam trương, đei iŏk yua sa yuơ tơdrong jơnei kơ kĕch mang. Kơ yuơ lơ loh, tơdrong pơm hơtŏk ‘lơ̆ng pơtho pơhrăm ‘noh kăl hloh, lơ̆m au kăl lăng ba hloi đơ̆ng rim jăl hŏk mâm non.