Lăp đơ̆ng rŏng mơ̆ng rim nơ̆r iung pơma tơ̆ jơ bơ̆ jang, Kơdră chĕp pơgơ̆r hôn bơnê dêh char hlôi jang keh đang 22 dơnau mong đak kĕ mong truh 520 triu m3 măh mai pơtruh đak sŏ nhă, jang sa; hlôi jing hơnih tơm rong hơdang kon lơ hloh lơ̆m teh đak. Tơmoi năm tơmang tơ̆ dêh char roi năr roi lơ. Tơdrong jŏh ayŏ-tơpôl đei lăng ba kơ jăp.

Tơƀôh hơdăh mĭnh ƀar trong tim gan lăp lơ̆m atŏk tơ iung kơ Ninh Thuận, Kơdră chĕp pơgơ̆r Teh đak Võ Văn Thưởng athei, Khul Đảng, Khul kơdră chĕp pơgơ̆r păng kon pơlei dêh char Ninh Thuận kăl hơnơ̆ng jang kiơ̆ tơdrong tơchơ̆t Pơm lêh hop akom Đảng rim hơnih, hăm trong atŏk kơtang, pơjing đei jơhngơ̆m pran ‘nao vă pơtrŭt atŏk kơtang atŏk tơ iung mŭk drăm-tơpôl tĕnh koăng păng kơjăp. Kơdră chĕp pơgơ̆r Teh đak jei athei dêh char hơnơ̆ng hơtŏk jơhngơ̆m ‘mĕh vă atŏk tơ iung, jơhngơ̆m đon tơgoăt tơgoăl, iung jang kơtang, jang kiơ̆ trong jang ‘lơ̆ng hơ iă, joăt joe sơ̆ ki, tơdrong oei sa, kon bơngai Ninh Thuận; Tơ iung pơjing tơdrong oei sa joh ayŏ atŏk tơ iung tôm tong kon bơngai Ninh Thuận.

Gơmăng năr 15/6, Kơdră chĕp pơgơ̆r Teh đak hlôi vang năm pơm Lêh sơng iŏk Hla bơar tơchơ̆t chih hơnăn đơ̆ng UNESCO hăm tơdrong pơm gŏ ge kơ bơngai Chăm lơ̆m Hla bơar chih răk mŭk drăm gĭt kăl dăr sơnăm kăl vei lăng năng tông păng pơgơ̆r blŭng a Pơm lêh Nho - Vang Ninh Thuận sơnăm 2023.