Tơ̆ Hnam pơgang apŭng Thanh Liêm, Kơdră chĕp pơgơ̆r teh đak hlôi năm tơmang hơnih jang kmăi kmŏk sơng bơngai jĭ năm khăm ming hơmet jĭ jăn iŏk yua kơtheh kăn kưk tơplih ăn kơtheh ƀao hiêm jang pơgang, mĭnh trong jang hơ nhăk ‘lơ̆ng hơ iă ăn bơngai jĭ, mă kăl dă ƀiơ̆ tơhiong jơ ‘năr ăn rim ƀok thây pơgang păng bơngai jĭ. Ƀlep lơ̆m năr tơbăt Năr Ƀok thây pơgang Việt Nam, tang măt ăn Kơdră chĕp pơgơ̆r Đảng, Teh đak, Kơdră chĕp pơgơ̆r Teh đak Võ Văn Thưởng pơtruh nơ̆r apĭnh jet gia pơma dơnuh ‘lơ̆ng hơ iă hloh ăn rim ƀok thây pơgang, kang ƀô̆ bơngai jang lơ̆m hnam pơgang apŭng Thanh Liêm păng dêh char Hà Nam.

Kơdră chĕp pơgơ̆r Teh đak hôn bơnê kơtang đơ̆ng hnam pơgang tơring truh tơ̆ apŭngh hlôi jang kiơ̆ ‘lơ̆ng rim tơdrong jang tơm Teh đak găh tơdrong jang pơgang tơring, ƀet bơ̆ng vaccine, vei lăng năng tông jơhngơ̆m ăn, tơbăt hơdăh tơdrong hơrih sa ăn đe hơdruh tơdăm păh kơchoong, khăm hơlen păng vei lăng năng tông bơngai jĭ jăn hơnơ̆ng. Kơdră chĕp pơgơ̆r Teh đak akhan, tơdăh hơnih jang pơgang tơring jang ‘lơ̆ng lei gô tơgop tơ iung pơjing ăn minh jơhnơr ‘lơ̆ng ro ăn tơring păng Teh đak.

Kơdră chĕp pơgơ̆r teh đak athei rim kơdră chĕp pơgơ̆r đảng, chĕp pơgơ̆r tơring păng hơnih bơ̆ jang pơm truh kơ dêh char Hà Nam, apŭng Thanh Liêm hơnơ̆ng lăng ba vă tơmơ̆t jên jang atŏk tơ iung khul bơ̆ jang, đơ̆ng nŏh pơm hơtŏk bơ̆ jang ‘lơ̆ng tơdrong chă khăm, ming hơmet jĭ jăn tơ̆ hnam pơgang tơring; hơmơ̆t tơmơ̆t jên jang răt kmăi kmŏk, tơmam drăm jang pơgang, tơ iung pơjing hnam pơgang gơ̆h hơgei, ‘lơ̆ng hơ iă, rơgoh ‘lơ̆ng.