Lăp đơ̆ng rŏng pơm lêh sơng, Kơdră chĕp pơgơ̆r Teh đak Võ Văn Thưởng hăm Ƀok kơdră tơm Hàn Quốc chă tơroi tơbăt dih băl rim kơdră kơpal kơ ƀar teh đak vang pơm lêh sơng. Kiơ̆ đơ̆ng rŏng ‘nŏh, ƀar ‘nu kơdră pơm tơm ƀar khul kơdră kơpal pơma đam.

Lăng kơjăp tơgoăt tơgoăl hăm Việt Nam, vang kiơ̆ Ƀok Kơdră tơm Hàn Quốc năm tơmang Việt Nam ‘măng mă au đei lơ kơdră kơpal, ‘noh đei: Kơ iĕng Thủ tướng iŏk vei lăng tơdrong jang mŭk drăm jang hloi Ƀô̆ trương Hơnih tơm Trong jang tơm păng Jên hu Choo Kyung Ho păng mĭnh ƀar ‘nu Ƀô̆ trương, kơdră chĕp pơgơ̆r rim hơnih tơm, hơnih bơ̆ jang. ‘Ngoăih kơ ‘noh oei đei hloh 200 hơnih mơdro sa Hàn Quốc. ‘Nau jing kơsô̆ hơnih mơdro sa lơ hloh lơ̆m ‘măng năm tơmang teh đak đe tơjê̆ au đơ̆ng Ƀok kơdră tơm Yoon, tơƀôh hơdăh tơdrong kăl lơ̆m jang hơdoi găh muk drăm, tơmơ̆t jên jang, mơdro sa kơ ƀar teh đak. Tơl nơ̆r apĭnh hơdrol năm tơmang Việt Nam, Ƀok kơdră tơm Hàn Quốc Yoon Suk Yeol ‘meh vă pơtrut kơtang jang hơdoi hăm Việt Nam lơ̆m lơ tơdrong.