Kơdră chĕp pơgơ̆r Teh đak Võ Văn Thưởng pơma hơdăh, tơdrong kăl ‘măng năm tơmang Việt Nam ‘măng mă au đơ̆ng khul ‘nŏh jing jơ ‘năr vă ƀar păh pơma dơnuh vang pơma dơnuh găh dôm trong jang hơdoi Việt Nam - Liên bang Nga, lơ̆m au đei jang hơdoi ƀar păh Đảng, ƀar Teh đak.

Ƀar ‘nu kơdră chĕp pơgơ̆r gô hơnơ̆ng pơtrŭt kơtang vang năm ngôi dih băl kơ kon pơlei, tơdrong pơgơ̆r joh ayŏ kơdŏ soang; atŏk kơtang hơnăp jang kơ rim Khul tơgoăt tơgoăl ‘lơ̆ng hơ iă kơ tơdrong pơvei dih băl joăt joe đơ̆ng sơ̆ ‘lơ̆ng liĕm hăm vă jê̆ 75 sơnăm. Kơdră chĕp pơgơ̆r Teh đak bơnê păng athei Liên bang Nga hơnơ̆ng lăng ba, pơjing rơvơn ăn kon pơlei Việt Nam tơ̆ Nga erih sa, jang sa, hŏk pơhrăm đunh đai tai sơnăm păng sơđơ̆ng.