Kơdră chĕp pơgơ̆r Teh đak Võ Văn Thưởng kơ kuh chơt hơ iă Kơdră chĕp pơgơ̆r Kuô̆k hô̆i Bulgaria năm tơmang Việt Nam ƀlep lơ̆m jơ ‘năr blŭng sơnăm ‘nao 2024, tơbăt hơdăh tơdrong lăng kơjăp păng yom kiơ̆ kơtang găh chinh trĭ lơ̆m tơgoăt tơgoăl jang hơdoi ƀar teh đak.

Ƀok Rossen Dimitrov Jeliazkov tơroi tơbăt ăn Kơdră chĕp pơgơ̆r Teh đak găh ‘măng pơma đam tôch jơnei hăm Kơdră chĕp pơgơ̆r Kuô̆k hô̆i Vương Đình Huệ păng pơma hơdăh, ‘meh vă ƀar păh hơdrin hloh dơ̆ng tơlĕch jang kiơ̆ rim trong jang hơdoi hrei au đei, lơ̆m au đei ‘măng hop akŏm Hơnih bơ̆ jang hơdoi Khul kơdră chĕp pơgơ̆r teh đak Việt Nam-Bulgaria.  Lơ̆m ‘măng năm tơmang, Khul hlôi năm ngôi bơ̆ jang tơ̆ mĭnh ƀar tơring, đơ̆ng nih ƀôh hơdăh dôm tơdrong đei vă jang hơdoi tôch kơ lơ ƀar păh tơring ƀar teh đak, pơ̆ih đei rơvơn ăn jang hơdoi găh mŭk drăm adoi nhen pơtrŭt kơtang kon pơlei năm ngôi dih băl; hôn bơnê Việt Nam ăn khul joăt jang pơtho nơ̆r Yuăn tơ̆ Bulgaria. Kơdră chĕp pơgơ̆r Teh đak Võ Văn Thưởng sơkơ̆t hơdăh, Việt Nam ling lang lăng kơjăp tơdrong tơgoăt tơgoăl hăm Bulgaria, lơ̆m khei năr kơnh, Kơdră chĕp pơgơ̆r Teh đak ‘meh vă ƀar păh kăl atok kơtang hloh dơ̆ng tơgoăt tơgoăl chinh trĭ tơbôl, ‘meh vă hrôih sơng Ƀok kơdră tơm Bulgaria adoi nhen rim Kơdră kơpal păng rim hơnih kơ Bulgaria năm tơmang Việt Nam.