Tơ̆ jơ sơng, Kơdră chĕp pơgơ̆r Teh đak Võ Văn Thưởng hôn bơnê kơtang Kơdră tang măt lơ̆m khei năr au ki hlôi hơdrin tôch ai đei pơgơ̆r rim ‘măng bơ̆ jang hăm rim hơnih bơ̆ jang kơ Việt Nam; năm tơmang lơ tơring vă pơtrŭt kơtang jang hơdoi ƀar teh đak kơtang hloh dơ̆ng păng iŏk đei jơnei.

Kơdră tang măt sơkơ̆t hơdăh, Hoa Kỳ gô hơnơ̆ng jang hơdoi kơjapw hăm Việt Nam lơ̆m hơmet pơ ‘lơ̆ng đơ̆ng tơdrong tơblăh vang sơ̆ pơm ăn, pơđĭ xek tơlang dôm tơdrong đei ƀơm kơnê̆ đơ̆ng ƀrơ̆m phao pơgang dioxin pơm ăn, chă hrip pleh ƀôm min păng tơchă bơngai hiong dong đơ̆ng rŏng tơblăh vang sơ̆. Vă hơnơ̆ng pơm kơtang hloh dơ̆ng tơdrong tơgoăt tơgoăl Việt Nam-Hoa Kỳ lơ̆m khei năr kơnh, Kơdră chĕp pơgơ̆r Teh đak athei ƀar păh atŏk kơtang hloh dơ̆ng rim tơdrong jang ăn rim khul năm ngôi dih băl, khul kơdră tơƀơ̆p dih băl; tơlĕch jang kơtang hloh dơ̆ng rim tơdrong jang, tơdrong vă jang hơdoi lơ̆m rim tơdrong hơnhăk đei iŏk yua trŏ lăp ăn ƀar teh đak, adoi tơgop kơtang ăn rơngei hiôk hian, sơđơ̆ng, jang hơdoi păng atŏk tơ iung tơ̆ tơring păng lơ̆m apŭng plĕnh teh.