Kơdră chĕp pơgơ̆r Teh đak Võ Văn Thưởng ‘meh vă păng lui, mă đơ̆ng kơchư̆k jang yă kiơ, Kơdră tang măt teh đak gô hơnơ̆ng ‘măn jơhngơ̆m đon tơgoăt tơgpoăl ‘lơ̆ng rŏ găh teh đak, kon bơngai Việt Nam, jĭ gơng tơroh kloh klĕch pơtrŭt kơtang tơgoăt tơgoăl joăt joe đơ̆ng sơ̆ păng Jang hơdoi git kăl Việt Nam - Phalăng.

Hmach chơt hơ iă ăn Kơdră tang măt Nicolas Warnery bơ̆ jang keh đang tơdrong jang tơ̆ Việt Nam, Kơdră chĕp pơgơ̆r Teh đak pơma hơdăh, hloh 50 sơnăm au ki, tơgoăt tơgoăl Việt Nam-Phalăng hlôi iŏk đei jơnei gĭt kăl, mă kăl lơ̆m 10 sơnăm pơjing tơgoăt tơgoăl jang hơdoi Gĭt kăl. Việt Nam bơnê tơdrong tơgŭm djru git kăl đơ̆ng Phalăng hlôi tơgŭm kơ triu kơliu vaccine tang găn jĭ hơbuh Covid-19. Vă atŏk kơtang tơgoăt tơgoăl ƀar teh đak lơ̆m khei năr kơnh, Kơdră chĕp pơgơ̆r Teh đak athei ƀar păh hơnơ̆ng pơtrŭt kơtang rim ‘măng chă tơƀơ̆p, pơma dơnuh năm ngôi dih băl khul kơdră chĕp pơgơ̆r. ‘Moi kiơ̆ Kơdră tang măt, Kơdră chĕp pơgơ̆r teh đak Việt Nam pơtruh nơ̆r krao hơvơn păng tơbăt Việt Nam hơpơi ‘meh vă sơng Ƀok kơdră tơm Phalăng Emmanuel Macron năm tơmang Việt Nam lơ̆m khei năr trŏ lăp hloh.