Sơng pơma dơnuh hăm Kơdră tang măt Venezuela Juan Carlos Fernandes Juarez, Kơdră chĕp pơgơ̆r Teh đak Võ Văn Thưởng hmach chơt hơ iă ăn Kơdră tang măt iŏk bơ̆ jang tơ̆ Việt Nam; lui akhan, lơ̆m jăl jang Kơdră tang măt Teh đak, tơdrong tơgoăt tơgoăl Việt Nam-Venezuela gô iŏk đei jơnei hle.

Kơdră chĕp pơgơ̆r Teh đak sơkơ̆t hơdăh, rim hơnih bơ̆ jang kơ Việt Nam gô hơdrin tơgŭm djru kơtang vă Kơdră tang măt teh đak jang keh kong tơdrong jang đei pơjao; tơgop pơtrŭt kơtang tơgoăt tơgoăl kơ ƀar teh đak. Sơng pơma dơnuh hăm Kơdră tang măt teh đak Lào, yă Khamphao Ernthavanh (Khăm-phau Ơn-tha-văn), Kơdră chĕp pơgơ̆r Teh đak Võ Văn Thưởng sơkơ̆t hơdăh, tơgoăt tơgoăl Việt Nam-Lào tơpă jing tơgoăt tơgoăl tôch gĭt kăl hloh đei rim kơdră chĕp pơgơ̆r sơ̆ ki kơ ƀar teh đak pơjing ăn păng atŏk tơ iung, hlôi jing tơdrong gĭt kăl hlŏh kơ ƀar hơdrĕch hơdrung. Kơdră chĕp pơgơ̆r Teh đak Võ Văn Thưởng sơkơ̆t hơdăh, rim hơnih bơ̆ jang kơ Việt Nam gô iung jang đĭ ai tơgŭm djru, iung jang hơdoi vă Kơdră tang măt teh đak jang keh đang dôm tơdrong jang đei pơjao.