Kơsơ̆ năr 24/5, sơng pơma dơnuh hăm rim Kơdră tang măt rim teh đak Qatar, Brazil, Slovenia, Bồ Đào Nha, Estonia păng Guinea pơtruh Kơthơ Teh đak iŏk bơ̆ jang tơ̆ Việt Nam, Kơdră chĕp pơgơ̆r Teh đak Võ Văn Thưởng sơkơ̆t hơdăh, rim hơnih bơ̆ jang kơ Việt Nam gô pơjing rơvơn hloh vă rim Kơdră tang măt atŏk kơtang jang hơdoi dih băl hăm Việt Nam roi năr roi atŏk tơ iung kơtang.

Sơng pơma dơnuh hăm Kơdră tang măt teh đak Qatar Khalid Ali Abdullah Abel, Kơdră chĕp pơgơ̆r Teh đak chơt hơ iă găh tơdrong tơgoăt tơgoăl, jang hơdoi ƀar teh đak atŏk tơ iung ‘lơ̆ng hơ iă, hơnơ̆ng ăn khul kơdră năm ngôi dih băl, tơjê̆ au ‘nŏh ‘măng năm tơmang Qatar đơ̆ng Kơ iĕng Kơdră chĕp pơgơ̆r Teh đak Võ Thị Ánh Xuân (5/2023). Kơdră chĕp pơgơ̆r Teh đak athei Kơdră tang măt lơ̆m jăl jang kơdih pơtrŭt kơtang tơgoăt tơgoăl ƀar teh đak găh rim tơdrong păng pơma tơbăt jơhngơ̆m đon ‘mĕh vă hrôih sơng hơvơn Ƀok pơtao Qatar Sheikh Tamim bin Hamad Al-Thani năm tơmang Việt Nam lơ̆m sơnăm 2023. Sơng pơma dơnuh hăm Kơdră tang măt Brazil Marco Farani, Kơdră chĕp pơgơ̆r Teh đak Võ Văn Thưởng sơkơ̆t hơdăh Việt Nam ling lang lăng kơjăp păng ‘meh vă atŏk kơtang hloh dơ̆ng tơgoăt tơgoăl păng jang hơdoi tôm tong hăm Brazil. Tơ̆ rim ‘măng tơƀơ̆p, Kơdră chĕp pơgơ̆r Teh đak Võ Văn Thưởng hôn bơnê kơtang kơ rim teh đak tơgŭm djru trong bơ̆ jang kơ ASEAN păng Việt Nam găh tơdrong Ƀiển Đông, xek tơlang rim tơdrong tơgar dih băl hăm rim trong rơngei hiôk hian ‘moi kiơ̆ yom kiơ̆ kơjăp khôi luơ̆t, mă kăl ‘noh UNCLOS 1982, sơđơ̆ng dơ̆ng kơjăp, duk păng gre păr chă kơdau chă păr hiôk hian; vei kơjăp rơngei hiôk hian, sơđơ̆ng păng atŏk tơ iung tơring.